Kuch Toh Bata Zindagi
Kuchh Bata De Zindagi Ai Zindagi
Maiñ kahāñ huuñ kuchh batā de zindagī ai zindagī
Phir sadā apnī sunā de zindagī ai zindagī
میں کہاں ہوں کچھ بتا دے زندگی اے زندگی!
پھر صدا اپنی سنا دے زندگی اے زندگی!
سو گئے اک ایک کر کے خانۂ دل کے چراغ
ان چراغوں کو جگا دے زندگی اے زندگی!
وہ بساط شعر و نغمہ رت جگے وہ چہچہے
پھر وہی محفل سجا دے زندگی اے زندگی!
جس کے ہر قطرے سے رگ رگ میں مچلتا تھا لہو
پھر وہی اک شے پلا دے زندگی اے زندگی!
اب تو یاد آتا نہیں کیسا تھا اپنا رنگ روپ
پھر مری صورت دکھا دے زندگی اے زندگی!
ایک مدت ہو گئی روٹھا ہوں اپنے آپ سے
پھر مجھے مجھ سے ملا دے زندگی اے زندگی!
جانے برگشتہ ہے کیوں مجھ سے زمانے کی ہوا
اپنے دامن کی ہوا دے زندگی اے زندگی!
رچ گیا ہے میری نس نس میں مری راتوں کا زہر
میرے سورج کو بلا دے زندگی اے زندگی!
خلیل الرحمن اعظمی
کوئی تبصرے نہیں:
ایک تبصرہ شائع کریں